భార్యను దారుణంగా హత్య చేసిన భర్త అరెస్టు...

Date : 16 September 2025 12:31 PM Views : 1086

ఆకాంక్ష న్యూస్ - క్రైం న్యూస్ / : పెద్దపల్లి జిల్లా రామగిరి పోలీస్ స్టేషన్ పరిధిలో దారుణ ఘటన చోటు చేసుకుంది. కుటుంబ కలహాల నేపథ్యంలో భార్యను దారుణంగా హత్య చేసిన భర్తను పోలీసులు అరెస్టు చేసినట్లు పెద్దపల్లి డీసీపీ కరుణాకర్ వెల్లడించారు. ఈ మేరకు గోదావరిఖని ఒకటో పట్టణ పోలీస్ స్టేషన్ లో మంగళవారం ఏర్పాటు చేసిన మీడియా సమావేశంలో ఆయన వివరాలను వెల్లడించారు.డీసీపీ కరుణాకర్ తెలిపిన వివరాల ప్రకారం, రామగిరి మండలం పన్నూరు గ్రామానికి చెందిన కృపాకర్, గోదావరిఖని వకీల్ పల్లి ఫ్లాట్లలో నివాసం ఉంటున్నాడు. సుమారు 13 ఏళ్ల క్రితం అతడు పూసాల రమాదేవి అనే యువతిని ప్రేమించి వివాహం చేసుకున్నాడు. ఈ దంపతులిద్దరికీ కొంతకాలం సజావుగానే గడిచినా, గత ఏడాది నుంచి చిన్నచిన్న విషయాలపై వాగ్వాదాలు జరుగుతూ వచ్చాయి. కుటుంబ కలహాలు ముదిరి పరస్పరం విభేదాలు ఎక్కువయ్యాయి.ఈ క్రమంలోనే సెప్టెంబర్ 14న మధ్యాహ్నం రమాదేవి తన భర్త కృపాకర్ ఇంటికి వెళ్లింది. ఇరువురి మధ్య మళ్లీ ఘర్షణ తలెత్తడంతో ఆవేశానికి లోనైన కృపాకర్, ఇంట్లో ఉన్న కత్తిని తీసుకుని విచక్షణారహితంగా భార్యపై దాడి చేశాడు. ఈ దాడిలో రమాదేవి తీవ్ర గాయాలపాలై అక్కడికక్కడే మృతిచెందింది. సమాచారం అందుకున్న వన్ టౌన్ పోలీస్ సంఘటనా స్థలానికి చేరుకుని కృపాకర్‌ను అదుపులోకి తీసుకున్నారు. నిందితుడి వద్ద నుంచి హత్యకు ఉపయోగించిన కత్తి, సంఘటన సమయంలో వాడిన బైక్‌ను స్వాధీనం చేసుకున్నారు. అయితే ఈ కేసులో అత్తమామలు కూడా ప్రమేయం ఉన్నట్లు ప్రాథమిక దర్యాప్తులో తేలిందని, వారు ప్రస్తుతం పరారీలో ఉన్నారని డీసీపీ కరుణాకర్ వెల్లడించారు. వారిని పట్టుకునేందుకు ప్రత్యేక బృందాలను ఏర్పాటు చేసి వెతుకుతున్నామని తెలిపారు. ఈ సంఘటనతో గోదావరిఖని పరిసర ప్రాంతంలో తీవ్ర విషాదం నెలకొంది. స్థానికులు రమాదేవి మరణాన్ని శోకసంద్రంలో మునిగిపోయి ఖండిస్తున్నారు. కుటుంబ సమస్యలు ఎంత ముదిరినా ప్రాణాలు తీయడం దారుణమని, ఈ తరహా సంఘటనలు మళ్లీ జరగకూడదని వారు ఆకాంక్షించారు.పోలీసులు కేసు నమోదు చేసి దర్యాప్తు కొనసాగిస్తున్నారు. నిందితుడిని రిమాండ్‌కు తరలించనున్నట్లు డీసీపీ స్పష్టం చేశారు.

భార్యను దారుణంగా హత్య చేసిన భర్త అరెస్టు...

లోకల్ యాడ్స్

మరిన్ని వార్తలు