పాడెపై తమ్ముడికి రాఖీ కట్టిన అక్క…

కూసుమంచి మండలం క్రిష్టాపురం గ్రామంలో విషాద ఘటన

Date : 08 August 2025 06:02 PM Views : 558

ఆకాంక్ష న్యూస్ - క్రైం న్యూస్ / : రాఖీ పౌర్ణమి పండుగ అంటే అక్కాచెల్లెళ్ళు, తమ్ముళ్ల బంధానికి ప్రతీక. కానీ ఈసారి రాఖీ పండుగ ఖమ్మం జిల్లా కూసుమంచి మండలం క్రిష్టాపురం గ్రామంలో కన్నీటి సముద్రంగా మారింది. గ్రామానికి చెందిన పందిరి అప్పిరెడ్డి (25) విషజ్వరం బారిన పడి మృతిచెందాడు. రాఖీ పండుగ రోజు ఉదయం అతడిని ఆసుపత్రికి తరలించే సమయంలో పాడెపై పడుకున్న తమ్ముడి చేతికి అక్క కన్నీళ్లతో రాఖీ కట్టి ఆప్యాయతను చాటుకోవడం అక్కడున్న వారిని కదిలించింది. మూడురోజుల క్రితం అప్పిరెడ్డికి జ్వరం వచ్చింది. మొదట పెద్దగా పట్టించుకోకపోవడంతో జ్వరం ఒక్కసారిగా పెరిగిపోయింది. శరీర బలహీనత పెరిగి కాలు మీద నిలబడలేని స్థితికి చేరుకున్నాడు. కుటుంబ సభ్యులు దగ్గరలోని ప్రైవేట్ వైద్యుడి వద్దకు తీసుకెళ్లగా పరీక్షల్లో విషజ్వరం అని తేలింది. మందులు వేసినా పరిస్థితి క్షీణించడంతో రాఖీ రోజు ఉదయం ఆసుపత్రికి తరలించేందుకు పాడెపై ఎక్కించారు. ఆ సమయంలో అక్క అతని పక్కన నిలబడి “నీకు ఏమీ కాదు రా తమ్ముడా… ఈ రాఖీ నిన్ను రక్షిస్తుంది” అని కన్నీళ్లు కారుస్తూ రాఖీ కట్టింది. తమ్ముడు బలహీనంగా ముసిముసి నవ్వి మళ్లీ కళ్ళు మూసుకున్నాడు.ఆసుపత్రిలో వైద్యులు చికిత్స అందించినా అప్పిరెడ్డి పరిస్థితి అదుపులోకి రాలేదు. సాయంత్రం అతడు మృతిచెందాడని వైద్యులు ప్రకటించారు. అక్క కట్టిన రాఖీ తమ్ముడి మృతదేహంపైనే ఉండగా ఆమె హృదయం పగిలిపోయింది. గ్రామం మొత్తం శోకసంద్రంలో మునిగిపోయింది. “రాఖీ అంటే రక్షణ, కానీ ఇక్కడ రాఖీ కట్టి కొన్ని గంటల్లోనే తమ్ముడు పోయాడు” అని గ్రామస్థులు కన్నీటి స్వరంతో చెబుతున్నారు.అప్పిరెడ్డి వ్యవసాయ కార్మికుడు. కుటుంబంలో తల్లిదండ్రులు వృద్ధులు. అక్క పెళ్లైనప్పటికీ ప్రతి సంవత్సరం రాఖీ పండుగకు తమ్ముడి దగ్గరకు వచ్చేది. ఈసారి రాఖీ తమ్ముడికి ఆఖరి కానుకగా మారిపోవడంతో ఆవేదనకు అంతులేదు. గ్రామంలో ఈ సంఘటనతో ఆరోగ్య సదుపాయాలపై చర్చ మొదలైంది. ముందే గుర్తించి సరైన చికిత్స అందించుంటే ప్రాణం నిలిచేదని పెద్దలు వాపోతున్నారు. జ్వరం వచ్చిన వెంటనే నిర్లక్ష్యం చేయకుండా పరీక్షలు చేయించుకోవాలని వైద్యులు సూచిస్తున్నారు. రాఖీ పండుగ రోజున పాడెపై రాఖీ కట్టిన అక్క, ఆ తరువాత తమ్ముడు ఆఖరి ఊపిరి విడిచిన దృశ్యం అక్కడ ఉన్న ప్రతి ఒక్కరి కళ్లలో నీరూర్చింది.

పాడెపై తమ్ముడికి రాఖీ కట్టిన అక్క…

కూసుమంచి మండలం క్రిష్టాపురం గ్రామంలో విషాద ఘటన

లోకల్ యాడ్స్

మరిన్ని వార్తలు