భవిత శ్రీ చిట్ తో బతుకులు ఆగమాగం... ఒక్కొక్కరిగా బయటకు వస్తున్న చిట్ ఫండ్ బాధితులు...
చిట్ ఫండ్ పేరుతో వందల కోట్ల రూపాయలు గోల్ మాల్...
ఆకాంక్ష న్యూస్ - ఆకాంక్ష డెస్క్ / : ఒకప్పుడు విస్తృత స్థాయిలో సేవలు అందిస్తున్నామని నమ్మబలికి, బ్రాంచ్ కార్యాలయాల పేరుతో డిపాజిటర్ల వద్ద డబ్బులు వసూలు చేసిన భవిత శ్రీ చిట్స్ యాజమాన్యం అసలు రంగు బయటపడుతోంది.యాజమాన్యం అకస్మాత్తుగా బ్రాంచ్ కార్యాలయాలను మూసి వేయడంతో, చిట్ సభ్యులు ఒక్కొక్కరుగా మోస పోయామని ముందుకు వస్తున్నారు. ఈ క్రమంలో తాజగా కాటారం పోలీస్ స్టేషన్‌లో మరో ఫిర్యాదు నమోదు అయింది.వివరాల్లోకి వెళ్తే...పెంట రజని అనే మహిళ ఇచ్చిన ఫిర్యాదు ప్రకారం... తాను 2022 నవంబర్ వరకు రూ.5 లక్షల చిట్‌లో సభ్యురాలిగా ఉండి, ప్రతినెల చెల్లింపులు చేసింది. అయితే 2022 డిసెంబర్ నెల్లో కాటారం బ్రాంచ్ కార్యాలయానికి వెళ్లగా ఆఫీసు తొలగించారని తెలిసింది. దీంతో హన్మకొండ మెయిన్ బ్రాంచ్‌ను ఆశ్రయించగా అక్కడి సిబ్బంది “రూ.2.38 లక్షలు మీకు రావాల్సి ఉంది” అంటూ చేతిరాత నోటు ఇచ్చారని పేర్కొన్నారు.అయితే పలుమార్లు హన్మకొండ బ్రాంచ్‌ను ఆశ్రయించినప్పటికీ డబ్బులు ఇవ్వకుండా వాయిదాలు వేస్తూ చివరకు బెదిరించేందుకు పూనుకున్నట్లు బాధితురాలు ఫిర్యాదులో వివరించారు. దీంతో ఆమె కాటారం పోలీసులను ఆశ్రయించగా భవిత శ్రీ చిట్స్ ఛైర్మన్ గుండా ప్రకాష్‌రావు, మేనేజింగ్ డైరెక్టర్ తాటిపల్లి శ్రీనివాస్, ఈడీ నాగరాజులపై పోలీసులు కేసు నమోదు చేశారు.చిట్ సంస్థల నిబంధనల ప్రకారం—చిట్ ఫండ్ లిమిటెడ్‌గా అనుమతులు పొందిన సంస్థ ఎక్కడైనా బ్రాంచ్ ప్రారంభించవచ్చు. అయితే ఆ బ్రాంచ్ పరిధిలో చేర్చుకున్న సభ్యుల వివరాలు, చిట్ విలువ, ప్రతి చిట్‌కు సంబంధించిన పూర్తి డిపాజిట్ డేటాను రిజిస్ట్రేషన్ కార్యాలయంలో సమర్పించాల్సి ఉంటుంది. అదేవిధంగా ఒక బ్రాంచ్‌ను మూసివేయాలంటే, ఆ బ్రాంచ్ ద్వారా నడుస్తున్న చిట్స్ పూర్తిగా సెటిల్ చేశామనే పూర్తి రికార్డులు రిజిస్ట్రేషన్ కార్యాలయానికి ఇవ్వాలి. అనుమతి వచ్చిన తరువాతే బ్రాంచ్‌ను పూర్తిగా తొలగించేందుకు అవకాశం ఉంటుంది.కానీ కాటారం బ్రాంచ్ తొలగించిన తరువాత కూడా సభ్యులు మోస పోయామని ముందుకు వస్తుండటంతో అసలు ఏం జరిగిందో అనుమానాలు తలెత్తుతున్నాయి. రిజిస్ట్రేషన్ కార్యాలయానికి సరైన రికార్డులు సమర్పించారా? లేక అధికారులను తప్పుదారి పట్టించారా? అనే అంశంపై విచారణ జరగాల్సిన అవసరం ఉన్నట్లు తెలుస్తోంది.అంతేకాక—ప్రతి చిట్ విలువ మేరకు డిపాజిట్లు చేసినట్టయితే వాటిని విక్రయించి బాధితులకు డబ్బులు చెల్లించే అవకాశం ఉంటుంది. ఒకవేళ నిబంధనలకు విరుద్ధంగా చిట్స్ నిర్వహించినట్టయితే చిట్ యాజమాన్యంపై అదనపు కేసులు నమోదు చేయాల్సి ఉంటుంది. అంతేకాకుండా చిట్ డబ్బుల బదులుగా ప్లాట్లు ఇస్తామని నమ్మ బలకడం కూడా నిబంధనలకు వ్యతిరేకమే కావడంతో బాధ్యులపై కఠిన చర్యలు తీసుకోవాలన్న డిమాండ్లు వినిపిస్తున్నాయి. బ్రాంచ్ కార్యాలయాలు మూసిన తరువాత కూడా బాధితులు బయటకు వస్తుండటం… భవిత శ్రీ చిట్స్ వ్యవహారంపై భారీ అనుమానాలను రేకెత్తిస్తోంది. విచారణలో అసలు నిజాలు వెలుగులోకి రావాలన్న అభిప్రాయం వ్యక్తమవుతోంది.
➡️ మీడియా పేరుతో సొంత ప్రచారం చేసుకుంటూ హల్చల్..
భవిత శ్రీ చిట్ ఫండ్ లో చిట్టీలు వేసిన బాధితులకు సమయానికి డబ్బులు చెల్లించకుండా యాజమాన్యం దుబారా ఖర్చులకు పాల్పడినట్లు విమర్శలు వెల్లువెత్తుతున్నాయి. గతంలో మీడియా పేరుతో వివిధ పేర్లతో మూడు యూట్యూబ్ ఛానల్ లను ప్రారంభించి తమకు సొంతం మీడియా ఛానళ్లను ప్రారంభించినట్లు గొప్పలు చెప్పుకొని ఎంతసేపు భజన కార్యక్రమాలను చేస్తూ ప్రజలను ఆకర్షించే ప్రయత్నం చేశారు. ఇదే కాకుండా నిబంధనలకు విరుద్ధంగా భవిత శ్రీ యాజమాన్యం యాగాలు హోమాల పేరుతో లక్షల కోట్ల రూపాయల దుబారకర్చు చేసి చిట్ ఫండ్ లో చిట్టిలు వేసిన బాధితులను మోసం చేసిందని విమర్శలు వెలువెత్తుతున్నాయి. ఇప్పటికే భవిత శ్రీ చిట్ ఫండ్ వందల కోట్ల కుంభకోణానికి పాల్పడినట్లు ఆరోపణలు వినిపిస్తున్నాయి. దీనిపై పూర్తి వివరాలను అధికారులు చిట్ ఫండ్ యాజమాన్యం నుండి రికార్డులను స్వాధీనం చేసుకొని పరిశీలిస్తే పెద్ద ఎత్తున అక్రమాలు బయట పడతాయనే ప్రచారం జోరుగా సాగుతుంది. ఇప్పటికైనా ఉన్నత అధికారులు ఈ దిశగా అడుగులు వేయాలని పలువురు బాధితులు కోరుతున్నారు.
Admin
Aakanksha News
మరిన్ని వార్తలు
Developed By :
